अलिबाग : रायगड जिल्ह्यातील कर्जत विभागाचे उपविभागीय पोलीस अधिकारी अनिल घेरडीकर हे 2016 ते मार्च 2019 या कालावधीत परभणी जिल्ह्यातील जिंतूर विभागाचे तत्कालीन उपविभागीय अधिकारी म्हणून कार्यरत असताना त्यांनी एका प्रकरणात केलेल्या उत्कृष्ट तपासासाठी केंद्रीय गृहमंत्रालयाने 2020 या वर्षाचे सर्वोत्कृष्ट तपासाचे पदक जाहीर केले आहे.
याबाबत सविस्तर माहिती अशी की, घेरडीकर हे परभणी जिल्ह्यातील जिंतूर येथे विभागीय अधिकारी म्हणून कार्यरत असताना, बोरी पोलीस ठाण्याच्या हद्दीत 1 नोव्हेंबर 2018 रोजी एका चिमुकलीवर नराधमाने लैंगिक अत्याचार केल्याची खळबळजनक घटना घडली होती. या प्रकरणी बोरी पोलीस ठाण्यात गुन्हा दाखल करण्यात आला. घडलेल्या घटनेमुळे ग्रामस्थांमध्ये रोष वाढला होता. या पार्श्वभूमीवर कोणीही साक्षीदार नसताना घेरडीकर तथा गुन्ह्याचे तपसिक अंमलदार यांनी तपासाची चक्रे वेगाने फिरवून तांत्रिक माहिती गोळा करत आरोपीचा मागोवा घेऊन त्यास ताब्यात घेतले. गुन्ह्यातील सर्व पुरावे गोळा करून आरोपीविरूद्ध परभणी जिल्हा सत्र न्यायालयात खटला दाखल केला होता. या खटल्याच्या सुनावणी अखेर न्यायालयाने आरोपीस मरेपर्यंत जन्मठेपेची शिक्षा सुनावली आहे.
डीवायएसपी अनिल घरेडीकर यांच्या याच कार्याची दखल केंद्रीय गृहविभागाने घेऊन त्यांना सर्वोत्कृष्ट तपासासाठी पदक जाहीर केले आहे