नवी दिल्ली : केंद्रीय गृहमंत्री अमित शाह यांना पुन्हा एकदा श्वासोच्छवासाचा त्रास जाणवू लागल्याने त्यांना ‘एम्स’ रुग्णालयात दाखल करण्यात आलं आहे, मागील काही दिवसांपासून शाहांना आरोग्यविषयक समस्या प्रकर्षाने जाणवत असल्याचे दिसत आहेत. या पार्श्वभूमीवर काल त्रास होऊ लागल्यानंतर त्यांना रात्री एम्स रुग्णालयात दाखल करण्यात आलं आहे.
तज्ज्ञ डॉक्टरांच्या देखरेखीखाली उपचार सुरू आहेत. शिवाय, त्यांची प्रकृती देखील स्थिर आहे. मागील दीड महिन्यात तीन वेळा शाह यांना रुग्णालयात दाखल व्हावं लागलेलं आहे. या अगोदर १८ ऑगस्ट रोजी शाह यांना रुग्णालयात दाखल करण्यात आलं होतं. उपचारानंतर त्यांना ३१ ऑगस्ट रोजी रुग्णालयातून डिस्चार्ज देण्यात आला होता.
केंद्रीय गृहमंत्री अमित शाह यांना २ ऑगस्ट रोजी करोनाची लागण झाली होती. त्यांनीच स्वत: ट्विट करत ही माहिती दिली होती. करोनाची प्राथमिक लक्षणं दिसत असल्याने चाचणी केली असता आपला रिपोर्ट पॉझिटिव्ह आल्याचं त्यांनीच सांगितलं होतं. अमित शाह यांनी संपर्कात आलेल्यांना स्वत:चं विलगीकरण तसंच चाचणी करण्याची विनंती केली होती. त्यानंतर १४ ऑगस्ट रोजी त्यांनी आपली करोना चाचणी निगेटिव्ह आल्याची माहिती दिली होती. तसंच डॉक्टरांनी दिलेल्या सल्ल्यानुसार पुढचे काही दिवस मी स्वतःला होम क्वारंटाइन करणार असल्याचं शाह यांनी सांगितलं होतं.