पेण (संतोष पाटील ) : काही दिवसांपूर्वी येऊन गेलेले निसर्ग चक्रीवादळ आणि मुसळधार पावसामुळे शेतकऱ्याने कष्टाने केलेली भाताची पेरणी वाहून गेली आहे. त्यातच आत्ता पावसाने दडी मारल्याने आलेली रोपे करपू लागली आहे. कोरोनातील लॉकडाऊनचे संकटात सुद्धा प्रतिकूल परिस्थितीवर शेतकऱ्याने दुर्लक्ष करत शेतीची लागवड केली आहे.
परंतु गेल्या दहा-बारा दिवसांपासून पेण तालुक्यातील हमरापूर-जोहे विभागासह खारेपाटात मोठ्या प्रमाणात कडा करपा रोगाचा प्रादुर्भाव दिसत आहे. त्याच्या बरोबर भाताची पाती कापणारी कीडही मोठ्या प्रमाणात भाताच्या पिकाला लागल्याने बळीराजा धास्तावला आहे. काही प्रमाणात आता भाताची रोपे फुलायला लागायला सुरुवात झालेली होती. परंतु पाती कापणाऱ्या आळीने भात पिकावर जोरदार हल्ला चढवल्याने मोठ्या प्रमाणात पिकांचे नुसकान होत आहे. त्याचप्रमाणे कडा करपा रोग पडल्याने भात रोपांच्या पात्या पिवळ्या पडल्या असून वेळेवर उपाययोजना केल्या नाही तर एकेकाळचे रायगड जिल्ह्यातील भाताचे कोठार म्हणून ओळखल्या जाणाऱ्या पेण तालुक्यातील भात शेतीचे मोठे नुकसान होण्याची शक्यता वर्तविली जात आहे.
याबाबत पेण तालुका कृषी विभागाकडे तक्रार करताच कृषी अधिकारी अनिल रोकडे, कृषी सहाय्यक अनुजा गुंजाळ, माजी सरपंच काशिनाथ पाटील, शेतकरी बालकृष्ण पाटील, अशोक पाटील, ज्ञानेश्र्वर पाटील, विश्वास पाटील यांच्यासमवेत कृषी कर्मचाऱ्यांनी खारेपाटातील शेतीला भेट देऊन शेतीची पाहणी केली. आणि कडा करपा रोगाचा प्रादुर्भाव, पाती कापणाऱ्या कीडीचा हल्ला थांबविण्याच्या दुष्टीने महत्वाची उपाययोजना करण्यासाठी मार्गदर्शनही केले.
प्रति 10 लिटर पाण्यात 25 ग्रॅम कॉपर ऑक्झिक्लोराईड आणि 5 ग्रॅम स्ट्रेप्टोसायक्लिन सल्फेट मिसळून संपूर्ण भात शेतीवर फवारणी करावी
– अनिल रोकडे, पेण तालुका कृषी अधिकारी