डॉ भानुबेन महेंद्र नानावटी महाविद्यालयाच्या श्रीमती कमलाबेन गंभीरचंद शहा कॉम्प्युटर अँप्लिकेशन्स विभागातर्फे १७ वा आंतरमहाविद्यालयीन टेक फेस्ट “टेकझोन” साजरा

मुंबई (शांताराम गुडेकर) : श्रीमती.कमलाबेन गंभीरचंद शहा कॉम्प्युटर अँप्लिकेशन्स विभागाने १२ आणि १३ जानेवारी २०२३ रोजी १७ वा आंतरमहाविद्यालयीन टेक फेस्ट टेकझोन आयोजित केला होता.

विद्यार्थ्यांनी आणि विद्यार्थ्यांसाठी आयोजित केलेला हा खास फेस्ट आहे. आयटी आणि कॉम्प्युटर क्षेत्रात करिअर करणाऱ्या मुंबईतील विविध महाविद्यालयांतील विद्यार्थ्यांना संवाद साधण्यासाठी, विचारांची देवाणघेवाण करण्यासाठी आणि विविध कार्यक्रमांमध्ये सहभागी होऊन स्पर्धात्मक भावना विकसित करण्यासाठी व्यासपीठ उपलब्ध करून समाकलित करणे हे त्याचे उद्दिष्ट आहे.

या दोन दिवसीय उत्सवाचा सहभागींनी मनापासून आनंद लुटला.५० पेक्षा अधिक महाविद्यालयातील ५०० पेक्षा अधिक विद्यार्थ्यांनी खालील १३ कार्यक्रमांमध्ये भाग घेतला. बॉक्स क्रिकेट, कार्यरत मॉडेल, वेब डिझायनिंग, नृत्य, खेळ, टेक क्विझ, चिट पिकर, बीट बॉक्सिंग, ई-कचरा, डिजिटल पोस्टर बनवणे, ट्रेजर हंट,ब्लाइंड कोड,मिस्टर आणि मिस टेकझोन आदींचा समावेश होता.विद्यार्थी आणि समाजामध्ये जनजागृती करण्यासाठी श्रीमती.के.जी.शाह कॉम्प्युटर ऍप्लिकेशन्स विभागातर्फे ई-वेस्ट कलेक्शन ड्राइव्ह स्पर्धेचे आयोजन करण्यात आले होते.

संकलित केलेला ई-कचरा एन.जी.ओ( N.G.O) स्त्री मुक्ती संघटनेला दान करण्यात आला. ही स्वयंसेवी संस्था वंचित कुळातील महिला आणि मुलांसाठी कार्यरत आहे.