ठाणे :कोकण विभाग शिक्षक मतदारसंघाची निवडणूक प्रक्रिया सुरू आहे. या निवडणुकीसाठी येत्या 30 जानेवारी 2023 रोजी मतदान होणार आहे. या निवडणुकीसाठी पात्र असलेल्या शिक्षकांना मतदान करण्यासाठी मतदानादिवशी विशेष नैमित्तिक रजा देण्यात आली असल्याची माहिती सहायक निवडणूक निर्णय अधिकारी तथा जिल्हाधिकारी अशोक शिनगारे यांनी दिली आहे.
भारत निवडणूक आयोगाने दि. २९ डिसेंबर २०२२ रोजीच्या प्रसिध्दी पत्रकान्वये, महाराष्ट्र विधान परिषदेच्या कोकण विभाग शिक्षक मतदार संघासाठी द्विवार्षिक निवडणूक कार्यक्रम घोषित केलेला आहे. या निवडणुकीचे मतदान दि. ३० जानेवारी , २०२३ (सोमवार) रोजी सकाळी ८.०० से दुपारी ४.०० पर्यंत व मतमोजणी दि. ०२ फेब्रुवारी, २०२३ (गुरुवार) रोजी होणार आहे.
महाराष्ट्र विधानपरिषदेच्या पदवीधर मतदार संघातील तसेच शिक्षक मतदारसंघातील निवडणुकीसाठी मतदार असलेल्या शिक्षक मतदारांना निवडणुकीच्या दिवशी मतदानाचा हक्क बजावता येण्यासाठी मतदानाच्या दिवसाची विशेष नैमित्तीक रजा राज्य शासनाच्या सामान्य प्रशासन विभागाच्या दि. २३ जून २०११ च्या शासन निर्णयानुसार मंजूर करण्यात आले असल्याची माहिती उपजिल्हा निवडणूक अधिकारी अर्चना कदम यांनी कळविले आहे.
