ठाणे : गेल्या चार वर्षांपूर्वी पंतप्रधान नरेंद्र मोदींनी ५०० आणि १००० च्या जुन्या नोटा चलनातून बंद होणार असल्याचे जाहीर केले आणि तत्क्षणी त्या नोटा व्यापाऱ्यांना देणाऱ्यांची तसेच दुसऱ्या दिवशी सकाळीच बँकांबाहेर नोटा जमा करण्यासाठी लोकांची रांग लागली. आता असे थेट कोणी जाहीर केलेले नसले तरी या बाबत आलेल्या बातम्यांमुळे जुन्या १००, १० आणि पाच रुपयांच्या आपल्याजवळच्या नोटा लोकांनी बाजारात वापरायला किंवा बॅंकेत जमा करायला बऱ्यापैकी सुरुवात केली आहे.
१०० आणि १० रुपयांच्या नोटा सर्रास वापरल्या जातात. कोणत्याही व्यवहारात या नोटांची अधिक देवघेव होते. मात्र आता १००, १० आणि ५ च्या जुन्या छपाईच्या नोटा लवकरच वापरातून बंद होणार असल्याची चर्चा सुरू होती. एका बॅंकेने याबाबत संकेत दिल्याचे वृत्तही होते. त्यामुळे ५००, १००० च्या नोटा बंद झाल्यावर पुरती दमछाक झालेली जनता आधीपासूनच या नोटा बाहेर खपवण्याच्या मागे लागली आहे. मात्र व्यापारी किंवा दुकानदार या नोटा सहजपणे स्वीकारताना व इतरांना देताना दिसत आहेत.
बँकेला कोणतीही सूचना नाही
जुन्या १००, १० आणि पाच रुपयांच्या नोटा लवकरच बंद होणार, अशी चर्चा होती. त्यामुळे अनेकांनी वैयक्तिक आणि बँकेत येऊनही चौकशी केली, मात्र आम्हाला बँकेत अद्याप अशा प्रकारची कोणतीही नोटीस किंवा सूचना आलेल्या नाहीत, अशी माहिती एका बँकेच्या वरिष्ठ अधिकाऱ्यांनी दिली.
जुन्या नोटांचे प्रमाण चलनात वाढले
सामान्य माणूस खूप मोठ्या प्रमाणात बँकेत या नोटा किंवा त्याचे बंडल जमा करत नसला तरी जमा होणाऱ्या नोटांमध्ये १०० च्या जुन्या नोटांचे प्रमाण अधिक आहे. तसेच बाजार, प्रवासभाडे अशाप्रकारच्या व्यवहारात याच जुन्या नोटा सर्रास वापरल्या जाताना दिसत आहेत.